Երիտասարդ մասնագետները քննարկեցին բյուջետային գործընթացում շահերի պաշտպանության մեխանիզմները

2025-02-13 13:33

Փետրվարի 12-ին «Բյուջեներ քաղաքացիների համար» ծրագրի երիտասարդ մասնագետների գիտելիքների փոխանցմանն ուղղված ուսումնական ծրագրի երկրորդ հոսքի շրջանակներում կայացավ առցանց քննարկում, որի նպատակն էր ամրապնդել երիտասարդ մասնագետների գիտելիքները բյուջետային գործընթացներում շահերի պաշտպանության արդյունավետ մեխանիզմների վերաբերյալ:

Հանդիպման մեկնարկին Իրավաբանների հայկական ասոցիացիայի ներկայացուցիչ Սյուզաննա Սողոմոնյանը ողջունեց մասնակիցներին ուսումնական ծրագրի մասնակցության համար և ցանկություն հայտնեց լսել երիտասարդների կարծիքը շահերի պաշտպանության բաղադրիչի թեմաների և առհասարակ ուսուցման առցանց փուլի վերաբերյալ։ Երիտասարդներից յուրաքանչյուրն արտահայտեցին իրենց տպավորությունները, ներկայացրեցին իրենց դիտարկումները և բարձր գնահատեցին ծրագրի փորձագետների կատարած աշխատանքը՝ նյութերն առավելագույնս մատչելի և ինտերակտիվ կերպով ներկայացնելու համար։

Այնուհետև, Սյուզաննա Սողոմոնյանը մանրամասն անդրադարձավ մասնակիցների հարցերին՝ կապված շահերի պաշտպանության գործիքների, ցանցային համագործակցության, հանրային մշտադիտարկման և պետական մարմինների հետ կառուցողական երկխոսության հաստատման հետ: Առանձնահատուկ ուշադրություն դարձվեց փաստահեն հանրային քաղաքականությունների մշակմանը և հանրության հետ արդյունավետ հաղորդակցության պլանավորմանը: Նշենք, որ երիտասարդներն առցանց ուսուցման փուլում արդեն ուսումնասիրել էին վերոնշյալի թեմաներն ու հավաքագրել իրենց հուզող հարցերը։

Քննարկման ավարտին ներկայացուցիչը հավաստեց, որ ուսումնական ծրագրի հետագա փուլերն էլ ավելի ինտերակտիվ, արդյունավետ և օգտակար են լինելու մասնակիցների գործնական հմտությունների զարգացման և մասնագիտական աճի գործում։

Հիշեցնենք, որ «Բյուջեներ քաղաքացիների համար» ծրագիրն (08 դեկտեմբեր 2022թ. – 07 դեկտեմբեր 2026թ) իրականացվում է Եվրոպական միության ֆինանսավորմամբ՝ «Իրավաբանների հայկական ասոցիացիա» ՀԿ-ի ,«Տնտեսական զարգացման և հետազոտությունների կենտրոն» ՀԿ-ի և «Ագորա Սենթրլ Յուրոփ» ՀԿ-ի (Չեխիա) հետ համագործակցությամբ:

This site is registered on wpml.org as a development site.