2024 թվականին ուսուցիչների կամավոր ատեստավորման ժամանակ ի հայտ եկած տեխնիկական խնդրի լուծումը տրվել է «Բյուջեներ քաղաքացիների համար» ծրագրի ենթադրամաշնորհառու «Մեդիան հանուն կրթության»  ՀԿ/mediaforedu.am լրատվական-վերլուծական կայքի ջանքերի գործադրմամբ։

«Մեդիան հանուն կրթության»  ՀԿ-ն «Կրթության ծախսեր/քննադատական մտածողության որակ» վեցամսյա ծրագրի շրջանակում ուսումնասիրում էր հանրակրթության ֆինանսավորումը՝ առանձնահատուկ ուշադրություն դարձնելով ուսուցիչների ատեստավորման գործընթացին։

Քանի որ Հայաստանում առաջին անգամ էր անցկացվում էլեկտրոնային եղանակով կամավոր ատեստավորում, որոշ տեխնիկական բարդություններ առաջացան թեստավորման հարթակի աշխատանքի ընթացքում՝ մասնավորապես՝ հարցերի քանակի և դրանց տեսանելիության մասով, ինչը կարող էր էականորեն ազդել մասնակիցների արդյունքների վրա։

ՀԿ-ն հանդես եկավ մի շարք հարցումներով ու առաջարկություններով՝ ուղղված համակարգի բարելավմանը, որոնք քննարկվել են ՀՀ ԿԳՄՍ նախարարության և Կրթական տեխնոլոգիաների ազգային կենտրոնի հետ։ Արդյունքում պաշտոնական հաստատությունները ձեռնարկեցին անհրաժեշտ քայլեր՝ շտկելու թեստավորման ընթացքում արձանագրված թերությունները։

Ի վերջո, 2025թ․ նոյեմբերի 6-ին ԿԳՄՍ նախարարությունը ներկայացրեց նոր տեսաուղեցույց, որը մանրամասն բացատրում է թեստավորման կարգը, ապահովում հարցերի հստակ տեսանելիություն և բողոքարկման հստակ մեխանիզմներ։ Այս պատմությունը օրինակ է, թե ինչպես կարող է քաղաքացիական նախաձեռնության և պետական կառույցների համագործակցությունը բերել արդյունավետ և շոշափելի արդյունքների կրթական ոլորտում։